Parish History
History of parish. . .
ಮಂಗ್ಳುರ್ ಶ್ಹೆರಾ ಥಾವ್ನ್ ತೊಕ್ಕೊಟ್ಟು - ಕೊಣಾಜೆ ರಸ್ತ್ಯಾ ಮುಖಾಂತ್ರ್ 22 ಕಿಮೀ. ಪಯ್ಸ್ ಆಸಾ ಫಜೀರ್ ಮ್ಹಳ್ಳೊ ಗಾಂವ್. ಆದಿಂ ವಾಹನಾಂ ಸೌಲತಾಯ್ ನಾತ್ ಲ್ಲ್ಯಾ ಫಜೀರಾಂತ್ ಆಜ್ ಕೊಣಾಜೆ ಮಂಗ್ಳುರ್ ವಿಶ್ವವಿದ್ಯಾಲಯ್, ಇನ್ ಫೋಸಿಸ್ ಸಂಸ್ಥೊ, ಇಂಜನಿಯರಿಂಗ್ ಕಾಲೇಜ್ ಆಶೆಂ ಸಬಾರ್ ವಿದ್ಯಾ ಸಂಸ್ಥೆ ಪಾಂಯ್ ಥೆಂಕ್ಲ್ಯಾ ಉಪ್ರಾಂತ್ ಪ್ರಗತೆಚಾ ವಾಟೆನ್ ಫುಡೆ ವಚೊನ್ ಆಸಾ.
ಗೊರ್ವಾಂ ಪೊಸಾಪ್ ಪ್ರಧಾನ್ ಜಾವ್ನಾಸ್ಚಾ ಕೃಷಿಕ್ ಕುಟ್ಮಾಂಕ್ ಪಾಚ್ವೆಂ ತಣ್ ಒದಗ್ಸುನ್ ದಿಂವ್ಚೆಂ ಪಾಚ್ವ್ಯಾ ಪರಿಸರಾಕ್ ತುಳು ಭಾಷೆಂತ್ ಪಜ್ಜಿ ಊರು(ಪಜೀರು) ಮ್ಹಳೆಂ ನಾಂವ್ ಆಯ್ಲಾಂ ಮ್ಹಳೆಂ ಜಾಣಾರಿ ಮ್ಹಣ್ತಾತ್. ಗುಡ್ಯಾ ಆನಿ ಫಾಲ್ಕ್ಯಾಂ ಮಧೆಂ ಪ್ರಾಕೃತಿಕ್ ಸೊಭಾಯೆನ್ ಥಂಯ್ ಹಾಂಗಾ ಆಸ್ಚಿಂ ವಸ್ತೆ ಘರಾಂ, ಕಿತೆಂಚ್ ಆವಾಜ್ ನಾಸ್ತಾಂ ಪ್ರಶಾಂತ್ ಪರಿಸರಾಂತ್ ಸೊಭ್ತಾ ಆಮ್ಚೊ ಗಾಂವ್ ಫಜೀರ್.
175 ವರ್ಸಾಚಾ ಕ್ರಿಸ್ತೀ ಭಾವಾಡ್ತಾಕ್ ಸಾಕ್ಸ್ ಜಾವ್ನ್ ಉಬಿ ಆಸಾ ಫಜೀರ್ ಚಿ ಮೆರ್ಸಿನ್ ಮಾಯೆಕ್ ಸಮರ್ಪಿಲ್ಲಿ ಫಿರ್ಗಿಜ್. ಆದಿಂ ಫಜೀರ್ ಇಗರ್ಜ್ ಉಳ್ಳಾಲ್ ಪಾನೀರ್ ಫಿರ್ಗಜೆಚೊ ವಾಂಟೊ ಜಾವ್ನಾಸ್ ಲ್ಲಿ. ತ್ಯಾ ಕಾಳಾರ್ ಆಮ್ಚೆ ಮಾಲ್ಘಡೆ ತಾಂಚಾ ಆತ್ಮೀಕ್ ಗರ್ಜಾಂಕ್ ಪಾಂಯ್ ವಾಟೆನ್ ಪಾನೀರ್ ವೆತಾಲೆ. ತಾಂಚೊ ಭಾವಾರ್ಥ್ ಇತ್ಲೊಕೀ ಮಿಸಾಚಾ ಬಲಿದಾನಾಂತ್ ಚುಕನಾಸ್ತಾ ಹಾಜರ್ ಜಾವ್ನ್ ಮುಖ್ಲ್ಯಾ ಸಂತತೆಕ್ ಭಾವಾರ್ಥಾಚೆಂ ಮಿಸಾಂವ್ ತ್ಯಾಗಾರ್ ಆನಿ ಸಾಕ್ರಿಫಿಸಾನ್ ಭೆಟವ್ನ್ ದಿಲಾಂ. ಆಶೆಂ ಆಸ್ತಾಂ ಆಮ್ಚ್ಯಾ ಗಾಂವ್ಚ್ಯಾ ಉತರ್ ಪ್ರಾಯೆಚಾ, ಪಿಡೆಸ್ತ್ , ಆಸ್ವಸ್ಥ್ ಭಾವಾಭಯ್ಣಿಂಕ್ ತಾಂಚೊ ಆತ್ಮೀಕ್ ಗರ್ಜೊ ಸುಧಾರ್ಸುಂಕ್ ಸಲೀಸ್ ಜಾಯ್ಶೆಂ ಫಜೀರಾಂತ್ಚ್ ಏಕ್ ದೇವ್ ತೇಂಪ್ಲ್ ಉಬಾರಿಜಯ್ ಮ್ಹಳ್ಳ್ಯಾ ಲೊಕಾಚೆ ಅಭಿಪ್ರಾಯೆಕ್ ಸರಿ ಜಾವ್ನ್ 1841 ಇಸ್ವೆಚಾ ಜನೆರಾಚಾ 1 ತಾರಿಕೆರ್ ನವ್ಯಾ ವರ್ಸಾಚಾ ಆಚರಣಾ ದ್ವಾರಿಂ ಹಾಂಗಾಸರ್ ಮಾಟ್ವಾಚಾ ಇಗರ್ಜೆ ಸಂಗಿಂ ಸ್ಥಾಪನ್ ಜಾಲಿ. ಆಶೆಂ ಫಜೀರಾಂತ್ ಏಕ್ ನವಿ ಫಿರ್ಗಜ್ ಜಲ್ಮಾಕ್ ಆಯ್ಲಿ.
ಸುರ್ವೆರ್ ಗೊಂಯಾಂ ಧರ್ಮ್ ಪ್ರಾಂತಾಂಚಾ ಹಾತಾ-ಖಾಲ್ ಆಸ್ ಲ್ಲಿ ಹಿ ಫಿರ್ಗ್ ಜ್ 1885 ತ್ ಮಂಗ್ಳುರ್ ಧರ್ಮ್ ಪ್ರಾಂತಾಚಾ ಹಾತಾಖಾಲ್ ಆಯ್ಲಿ. ಫಜೀರ್ ಚೊ ಪಯ್ಲೊ ವಿಗಾರ್ ಮಾ| ಅಂತೋನ್ ಕುವೆಲ್ಲೊ (1867 - 1877) ಹಾಂಚಾ ಆವ್ದೆಂತ್ ಹ್ಯಾ ಜಾಗ್ಯಾರ್ ಜನಸಂಖೊ ಉಣೊ ಆಸೊನ್ ರಾನ್ - ಮನ್ಜಾತೆಚೊ ಆಶ್ರಯ್ ಜಾಗೊ ಜಾವ್ನಾಸ್ ಲ್ಲೊ. ರಾನ್ ಚ್ ಆಸ್ ಲ್ಲ್ಯಾ ಹ್ಯಾ ಗಾವಾಂತ್ ಏಕ್ ಇಗರ್ಜ್ ಬಾಂದುನ್ ಕಾಕುಳ್ತಿ ಮಾಯೆಕ್ ಅರ್ಪುನ್ ಹೊ ಜಾಗೊ ರುತಾ ಕರುಂಕ್ ಮಾ | ಅಂತೊನ್ ಕುವೆಲ್ಲೊ ಬಾಪಾನಿಂ ಕೆಲ್ಲೊ ವಾವ್ರ್ ಹೊಗ್ಳಿಕೆಕ್ ಫಾವೊ. ಗಾಂವ್ಚ್ಯಾ ಭಕ್ತಿಕಾಂಚೊ ಮುಖೆಲ್ಯಾಂಚೊ ಸಹಕಾರ್ ಆಪ್ಣಾಂವ್ಚಾಂತ್ ವಿಗಾರಾಚಿ ಉಮೆದ್ ಕಾರಣ್ ಜಾಲ್ಲಿ. ಹಾಂಗಾಚಾ ಲೊಕಾ ಥಂಯ್ ದೇವ್ ಭಿರಾಂತ್ ವಾಡೊನ್ ಯೇಂವ್ಕ್ ಧಾ ವರ್ಸಾಂ ನಿರಂತರಿ ವಾವುರ್ ಲ್ಲಿ ಕೀರ್ತ್ ಬಾಪ್ ಆಂತೋನ್ ಕುವೆಲ್ಲೊಕ್ ಫಾವೊ ಜಾತಾ.
1877 ತ್ ವಿಗಾರ್ ಜಾವ್ನ್ ಆಯಿಲ್ಲೆ ಬಾಪ್ ಆಸ್ಸಿಸಿನ್ಸ್ ಡೆನಿಸ್ . ದೋನ್ ವರ್ಸಾಂಚಾ ಆವ್ದೆಂತ್ ಲೊಕಾ ಥಂಯ್ ಧಾರ್ಮಿಕ್ ಜಾಗೃತಿ ಹಾಡ್ ಲ್ಲಿ ಕೀರ್ತ್ ಹಾಂಕಾ ಫಾವೊ ಜಾತಾ.
1879 ತ್ ಬಾಪ್ ಕೆರುಬಿಮ್ ಕೊಸೆಸಾಂವ್ ಫೆರ್ನಾಂಡಿಸ್ ವಿಗಾರ್ ಜಾವ್ನ್ ಆಯಿಲ್ಲ್ಯಾ ಉಪಾಂತ್ರ್ ಆತ್ಮೀಕ್ ಸಂಗ್ತಿಂಕ್ ವಿಶೇಷ್ ಮಹತ್ವ್ ದೀವ್ನ್ ಲೊಕಾ ಥಂಯ್ ಆತ್ಮೀಕ್ ಉರ್ಬಾ ಚಡೊಂವ್ಚೆಂ ಪ್ರಯತ್ನ್ ಕೆಲೆಂ. ಮೆರ್ಸಿನ್ ಮಾಯೆಚಾ ಮಾನಾಕ್ ತೋರ್ ಬಾಂದ್ಲಿ.
1892 ತ್ ಬಾಪ್ ಜೆ.ಎಂ.ಸಿ ಗೋಮ್ಸ್ ವಿಗಾರಾಚೆ ಸ್ಥಾನ್ ಘೆತಾತ್. ಹಾಂಚಾ ಆವ್ದೆಂತ್ ಯಾಜಾಕಾಚೆಂ ವಸ್ತೆ ಘರ್, ಇಗರ್ಜೆ ಮುಖಾರ್ ಮೆರ್ಸಿನ್ ಮಾಯೆಚಿ ಇಮಾಜ್ , ಸಾಂ. ಲೊರೆಸಾಚಿ ಇಮಾಜ್, ಸಾಂ ಲೊರೆಸಾಚಾ ಮಾನಾಕ್ ವಾರ್ಷಿಕ್ ಫೆಸ್ತ್ ಆಚರಣ್ ಕರ್ಚಿ ರಿವಾಜ್ ಆರಂಭ್ ಜಾಲಿ.
1901 - 1903 ಮಾ|ಬಾ| ರುಜಾರ್ ಮಾರ್ಟಿನ್ ಲೋಬೊ
1903- ಮಾ|ಬಾ| ರುಜಾರಿಯೋ ಪಿ.ಬಿ ಲುವಿಸ್
1903 - 1904 ಮಾ|ಬಾ| ನಿಕ್ಲಾಂವ್ ಕಾರ್ನೆಲಿಯೊ
1904 - 1911 ಮಾ|ಬಾ| ಜೊಸೆಫ್ ಮಿನೇಜಸ್
ಮಾ|ಬಾ| ಜೋಸೆಫ್ ಮಿನೇಜಸಾಚಾ ಆವ್ದೆಂತ್ ಕುರ್ಡೊವಿಶ್ವಾಸ್ ಕಾಡ್ನ್ ಉಡೊಂವ್ಚಾಂತ್ ಲೊಕಾ ಥಂಯ್ ಧಾರ್ಮಿಕ್ ಜಾಗೃತಿ ಆನಿ ಆತ್ಮೀಕ್ ಸಂಗ್ತಿ ಥಂಯ್ ಚಡ್ ಆನಿ ಚಡ್ ಮಹತ್ವ್ ದೀಂವ್ಕ್ ಹರ್ ಪ್ರಯತನ್ ಕೆಲೆಂ.ಲೊಕಾ ಥಂಯ್ ಆಸ್ಲಲೊ ಅಂದ್ಕಾರ್ ಪಯ್ಸ್ ಕರ್ಚಾ ಉದ್ದೇಶನ್ ಸಾಂ, ಜುಜೆ ಪ್ರಾಥಮಿಕ್ ಇಸ್ಕೊಲಾಚೆ ಆರಂಭ್ ಜಾಲೆಂ. ಹ್ಯಾ ಗಾವಾಂತ್ ಪಯ್ಲೆಂ ಇಸ್ಕೊಲ್ ಸುರು ಕೆಲ್ಲಿ ಕೀರ್ತ್ ಭಾ| ಜೋಸೆಫ್ ಹಾಂಕಾ ಫಾವೊ ಜಾತಾ. ಇಗರ್ಜೆಚೆ ದುರಸ್ತಿ ಕಾಮ್ ಹಾತಿಂ ಘೆವ್ನ್ ಮಾತ್ಯೆಚಿ ವೊಣೊದ್ ಕಾಡ್ನ್ ಫಾತ್ರಾಂನಿ ಭಾಂದಯ್ಲಿ. ಫಿರ್ಗಜೆಚಾ ಆರ್ಥಿಕ್ ಅಭಿವೃದ್ಧೆ ವಿಶ್ಯಾಂತ್ ಚಿಂತಾಪ್ ಆಟವ್ನ್ ಇಗರ್ಜೆ ಮುಕಾರ್, ಪ್ರಸ್ತುತ್ ಕೊವೆಂತಾ ಲಾಗ್ಸರ್ ತಶೆಂಸ್ ಉರ್ ಲ್ಲೆ ಕಡೆನ್ ಜಾಗೆ ಘೆತ್ಲೆ.
ಮಾ| ಬಾ| ಫ್ರಾನ್ಸಿಸ್ ಎಸ್. ಡಿಸೋಜಾ(1911 - 1923) ಹಾಂಚಾ ಆವ್ದೆಂತ್ ಅಮ್ಮೆಂಬಳ್, ಕೆದೂರ್ , ಕದಾಂತೆ ತಶೆಂಚ್ ಕಿನ್ನಾಜೆ ಥಾವ್ನ್ ಆತ್ಮೀಕ್ ಗರ್ಜಾ ಖಾತಿರ್ ಪಯ್ಸ್ ಥಾವ್ನ್ ಯೆಂವ್ಚ್ಯಾ ಲೊಕಾಚೆ ಕಷ್ಟ್ ಸಮ್ಜೊನ್ ಅಮ್ಮೆಂಬಳಾಂತ್ ಇಗರ್ಜ್ ಬಾಂದಯ್ಲಿ. ಭುರ್ಗ್ಯಾಚಾ ಶಿಕ್ಪಾ ಖಾತಿರ್ ಥಂಯ್ಸರ್ ಚ್ ಏಕ್ ಪ್ರಾಥಮಿಕ್ ಇಸ್ಕೊಲ್ ಸುರುಕೆಲೆಂ 12 ವರ್ಸಾಂಚಾ ನಿರಂತರ್ ಸೆವೆ ಉಪ್ರಾಂತ್ ಹಾಂಚೊ ಭಾವ್ ಬಾ| ಗ್ರೆಗರಿ ಎ. ಡಿಸೋಜಾ 1923 ತ್ ವಿಗಾರ್ ಜಾವ್ನ್ ಸೆವಾ ಮುಂದರಿತಾತ್. ಧಾರ್ಮಿಕ್ ಸಂಗ್ತಿಂಕ್ ಚಡಿತ್ ಪ್ರಾಮುಖ್ಯತಾ ದೀವ್ನ್ ವಿಗಾರಾಚಾ ವಸ್ತೆ ಘರಾಂತ್ ಜಾಗ್ಯಾಚಿ ಅಡ್ಚಣಿಂ ಆಸ್ ಲ್ಲಿ ಜಾಣಾ ಜಾವ್ನ್ ವಸ್ತೆ ಘರಾಚಾ ವಿಸ್ತರಣ್ ಕಾರ್ಯಾಕ್ ಸುರ್ವಾತ್ ದಿಲಿ. ಇಗರ್ಜೆ ಜಾಗ್ಯಾರ್ ಕೃಷಿ ಕರ್ಚೆ ವಿಶ್ಯಾಂತ್ ಯೀ ಚಡಿತ್ ಗಮನ್ ದಿಲೆಂ, ಫಿರ್ಗಜೆ ಖಾತಿರ್ ಖಳ್ಮಿತ್ ನಾಸ್ತಾನಾ ವಾವುರ್ನ್ 1930 ಸಪ್ಟೆಂಬರ್ 1ವೆರ್ ಹಾಂಗಾಸರ್ ಚ್ ದೆವಾದಿನ್ ಜಾಲೆ. ಫಿರ್ಗಜೆಚ್ಯಾ ಲೊಕಾಚಾ ಕಾಳ್ಜಾ - ಮನಾಂತ್ ಅಮರ್ ಜಾಂವ್ಕ್ ಪಾವ್ಲೆ.
ಉಪ್ರಾಂತ್ 1930- 1934 ಪರ್ಯಾಂತ್ ಮಾ| ಬಾ| ಪಿ. ಎಲ್ . ಬೊತೆಲ್ಲೊ ಹಾಂಚ್ಯಾ ಸೆವೆ ಆವ್ದೆಂತ್ , ಹಾಂಚ್ಯಾ ಮುಖೆಲ್ಪಣಾಖಾಲ್ ಸಬಾರ್ ಕಾಮಾಂ ಜಾಲಿಂ. ಇಸ್ಕೊಲಾ ಖಾತಿರ್ ನವೆಂ ಬಾಂದಪ್ ಬಾಂದ್ಲೆಂ. ಪಾಂಚ್ವ್ಯಾ ಕ್ಲಾಸಿಕ್ ಸರ್ಕಾರಾ ಥಾವ್ನ್ ಮಾನ್ಯತಾ ಲಾಬ್ಲಿ. ಅಮ್ಮೆಂಬಳ್ ಇಗರ್ಜ್ ಸ್ವತಂತ್ರ್ ಫಿಗರ್ಜ್ ಜಾವ್ನ್ ಪರಿವರ್ತನ್ ಜಾಲಿ.
1934 - 37 ಹ್ಯಾ ಆವ್ದೆಂತ್ ಮಾ| ಬಾ| ಜಿ.ಎಸ್ . ಲುವಿಸ್ ವಿಗಾರ್ ಜಾವ್ನ್ ಸೆವಾ ದಿಲ್ಯಾ.
1937- 48 ಹ್ಯಾ ಆವ್ದೆಂತ್ ಮಾ| ಬಾ| ಸಾಲ್ವದೊರ್ ಸಿ.ಎ ರೊಡ್ರಿಗಸ್ ವಿಗಾರ್ ಜಾವ್ನ್ ಸೆವಾ ದಿತಾತ್. ಹಾಂಚ್ಯಾ ಆವ್ದೆಂತ್ ಬಾ| ಎಡ್ವರ್ಡ್ ಲೋಬೊ, ಬಾ | ಅಲೆಕ್ಸಾಂಡರ್ ಸಿಕ್ವೇರಾ, ಬಾ | ರಫಾಯೆಲ್ ಡಿಸೋಜಾ , ಬಾ | ಮೈಕಲ್ ನೊರೊನ್ಹಾ ಹಾಣಿಂ ವಿಗಾರಾಕ್ ಸಹಕಾರ್ ದಿಲೊ. ಉಳ್ಳಾಲ್ - ಪಾನೀರ್ ಫಿರ್ಗಜೆಚೊ ವಾಂಟೊ ಜಾವ್ನಾಸ್ ಲ್ಲ್ಯಾ ಪಾಂಡಿಕಟ್ಟ್ ವಾಡ್ಯಾಚೊ ಮುಡಿಪು ದರ್ಖಾಸ್ ದಾನ್ ಜಾವ್ನ್ ದಿಲ್ಲ್ಯಾ ಜಾಗ್ಯಾರ್ ಸಾಂ
ಜುಜೆ ವಾಜಾಚಾ ಅಜಾಪಾಂಚಾ ಥಳಾರ್ ಲ್ಹಾನ್ ಶೆಂ ಕೊಪಲ್ ಬಾಂದುಂಕ್ ಸುರುಂ ಕೆಲೆಂ. ಬಾ| ರೊಡ್ರಿಗಸಾಚಾ ಆವ್ದೆಂತ್ 1938 ಜೂನ್ 5ವೆರ್ ಅರ್ಸುಲಾಯ್ನ್ ಭಯ್ಣಿಂಚೆಂ ಕೊವೆಂತ್ ಆರಂಭ್ ಜಾಲೆಂ. ಅಶೆಂ ಇಸ್ಕೊಲಾಚೆ ಶಿಕಪ್ ಧರ್ಮ್ ಭಯ್ಣಿಂ ಮುಖಾಂತ್ರ್ ಮೆಳೊಂಕ್ ಕಾರಣ್ ಜಾಲೆಂ. 1942 ತ್ ಚೆಡ್ವಾಂ ಭುರ್ಗ್ಯಾಂಕ್ ಪ್ರತ್ಯೇಕ್ ಇಸ್ಕೊಲ್ ಪ್ರಾರಂಭ್ ಕೆಲೆಂ.
ಮಾ| ಬಾ| ಆಂದ್ರು ಜೆ. ಪಿಂಟೊ (1948-53) , ಪಾಂಚ್ ವರ್ಸಾಂಚಾ ಆವ್ದೆಂತ್ ಫಿರ್ಗಜ್ ಲೊಕಾಚೊ ಆತ್ಮೀಕ್ ಆನಿ ಲೌಕಿಕ್ ಗರ್ಜೊ ಸುಧಾರ್ಸುನ್ ಮಾರ್ಗದರ್ಶನ್ ಆನಿ ಉತ್ತೇಜನ್ ದಿಲೆಂ.
1954 - 61 ಮಾ| ಬಾ| ಪಿಯಾದ್ ಎನ್. ಪಿಂಟೊ ವಿಗಾರ್ ಜಾವ್ನ್ ಸೆವಾ ದಿತಾತ್. ಭಲಾಯ್ಕಿ ಬರಿ ನಾಂ ಜಾಲ್ಯಾರ್ ಯೀ ದೇವ್ ಭಕ್ತೆಚೊ ಜಾವ್ನಾಸ್ ಲ್ಲ್ಯಾ ತಾಂಕಾ ಲೊಕಾಚೊ ಗರ್ಜೊ ಸುಧಾರ್ಸುಂಕ್ ಕಷ್ಟಾಂಚೆಂ ಮ್ಹಣ್ ಭೊಗುಂಕ್ ನಾ. ಸಾಂ ಜುಜೆ ಪ್ರಾಥಮಿಕ್ ಇಸ್ಕೊಲ್ , ಹೈಯರ್ ಪ್ರೈಮರಿ ಇಸ್ಕೊಲ್ ಜಾವ್ನ್ ಪರಿವರ್ತನ್ ಕೆಲೆಂ. ಸೈಂಟ್ ಮೇರಿಸ್ ಚೆಡ್ವಾಂ ಭುರ್ಗ್ಯಾಚೆಂ ಇಸ್ಕೊಲಾಚಿ ದುರಸ್ತಿ ಕರುನ್ ಇಗರ್ಜೆ ಮುಕ್ಲೊ ಪೊರ್ಟಿಕೊ ಬಾಂದಯ್ಲೊ.
1961- 68 ಪರ್ಯಾಂತ್ ವಿಗಾರ್ ಜಾವ್ನ್ ಬಾ| ರೊಜಾರಿಯೊ ಫೆರ್ನಾಂಡಿಸ್ ಸೆವಾ ದಿತಾತ್. ಶಿಸ್ತೆಕ್ ನಾಂವಾಡ್ ಲ್ಲೊ ಬಾಪ್ ಫೆರ್ನಾಂದ್ ಹರ್ಯೆಕಾ ಕಾಮಾಂತ್ ಯೀ ತಿತ್ಲೊಚ್ಚ್ ಶಿಸ್ತೆಚೊ. ಯಾಜಕಾಚೆಂ ವಸ್ತೆ ಘರ್ ನವ್ಯಾನ್ ಬಾಂದಯ್ಲೆಂ. ನವ್ಯಾ ಘರಾಂಚೆ ಆಶೀರ್ವಚನ್ 1963 ಮೇ 14 ವೆರ್ ತವಳ್ಚೊ ವಿಗಾರ್ ಜೆರಾಲ್ ಕರ್ತಾ ಆನಿ ಹ್ಯಾಚ್ ದಿಸಾ ನವ್ಯಾ ಇಗರ್ಜೆಚೆಂ ಕಾಮ್ ಹಾತಿ ಘೆತ್ಲೆಂ. ಚಾರ್ ವರ್ಸಾಂಚಾ ಹ್ಯಾ ನಿರಂತರ್ ವಾವ್ರಾ ಉಪ್ರಾಂತ್ 1967 ದಶೆಂಬರ್ 7ವೆರ್ ಮಂಗ್ಳು ರ್ಚೊ ತವಳ್ಚೊ ಗೊವ್ಳಿಬಾಪ್ ಅಧಿಕ್ ಮಾ| ದೊ| ಬಾಜಿಲ್ ಸಾಲ್ವದೊರ್ ಸೋಜ್ ಹಾಂಚೆ ಥಾವ್ನ್ ನವೀಕೃತ್ ಇಗರ್ಜೆಚೆಂ ಆಶೀರ್ವಚನ್ ಜಾಲೆಂ ಕಾಕುಳ್ತಿ ಮಾಯೆಚೆಂ ವಾರ್ಷಿಕ್ ಫೆಸ್ತ್ ಗದ್ದಳಾಯೆನ್ ಆಚರಣ್ ಕರುಂಕ್ ಸುರ್ವಾತ್ ಕೆಲೆಂ.
1968- 69 ಆವ್ದೆಂತ್ ಬಾ| ಜೆ.ಜೆ. ಮಾರ್ಟಿಸ್ ತಾತ್ಕಾಲಿಕ್ ವಿಗಾರ್ ಜಾವ್ನ್ ಸೆವಾ ದಿತಾತ್. ತಾಂಚ್ಯಾ ಸಾದ್ಯಾ ಜಿಣಿಯೆ ದ್ವಾರಿಂ ಲೊಕಾಕ್ ಮೇಲ್ಫಂಕ್ತ್ ಜಾವ್ನಾಸ್ ಲ್ಲೆ.
1969 - 78 ಹ್ಯಾ ಆವ್ದೆಂತ್ ಮಾ| ಬಾ | ರೋಬರ್ಟ್ ಝಡ್ . ಎಂ . ಡಿಸೋಜಾ ವಿಗಾರ್ ಜಾವ್ನ್ ಸೆವಾ ದಿತಾತ್. ನೋವ್ ವರ್ಸಾಂಚಾ ನಿರಂತರ್ ಸೆವೆ ಆವ್ದೆಂತ್ ಫಿರ್ಗಜ್ಗಾರಾಂಚಿಂ ಮನಾಂ ಜಿಕ್ಚ್ಯಾಂತ್ ಸುಫಳ್ ಜಾಲ್ಯಾತ್. ಲೊಕಾಚೆ ಸಮಸ್ಸೆ ಪರಿಹಾರ್ ಕರುಂಕ್ ಸಲಹಾ ಸಮಿತಿ ಆನಿ ಸಂಘ್ ಸಂಸ್ಥೆ ಆರಂಭ್ ಕರುನ್ ಲೊಕಾಚಾ ಆತ್ಮೀಕ್ ಆನಿ ಲೌಕಿಕ್ ಗರ್ಜೆಕ್ ಆಧಾರ್ ದಿತಾತ್. ಕ್ರೀಸ್ತಿ ಶಿಕ್ಷಣ್ ಲೊಕಾಚಾ ಜಿಣ್ಯೆಂತ್ ಕಶೆಂ ಲಾಗು ಕರ್ಚೆಂ ಮ್ಹಣ್ ಶಿಕವ್ಣ್ ದಿತಾತ್. ಕುಟ್ಮಾಚಿ ಭೆಟ್ ಕರುನ್ ಲೊಕಾಚಿ ಆರ್ಥಿಕ್ ಪರಿಸ್ಥಿತಿ ಸಮ್ಜೊನ್ ಲೊಕಾಕ್ ಬ್ಯಾಂಕ್ ಸವ್ಲತಾಯೊ ಮೆಳ್ಚಾ ವಿಶ್ಯಾಂತ್ ಮಾರ್ಗದರ್ಶನ್ ದೀವ್ನ್ ಭುಸುಧಾರಣ್ ಕಾನುನಾದ್ವಾರಿಂ ಡಿಕ್ಲರೇಶನ್ ಅರ್ಜಿ ಘಾಲುಂಕ್ ತಶೆಂಚ್ ಧನಿ ವೊಕ್ಲಾಂಚೆಂ ಸಮಸ್ಯೆ ಪರಿಹಾರ್ ಕರುಂಕ್ ಹರ್ ಪ್ರಯತನ್ ಕರ್ಚ್ಯಾಂತ್ ಸುಫಳ್ ಜಾಲೆ. ಲೊಕಾಚೆ ಕಷ್ಟ್ ಭೋವ್ ಲಾಗ್ಶಿಲ್ಯಾನ್ ಒಳ್ಕೊನ್ ದುಬ್ಳ್ಯಾ ದಾಕ್ಟ್ಯಾಂಚ್ಯಾ ಸೆವೆಕ್ ಕೆದಳಾಯ್ ತಯಾರ್ ಮ್ಹಣ್ ದಾಕವ್ನ್ ದಿತಾಲೆ. ಭುರ್ಗ್ಯಾಂ ಥಂಯ್ ವಿಶೇಷ್ ಮೋಗ್ ದಾಕವ್ನ್ ಇಸ್ಕೊಲಾಕ್ ವಿಸ್ತಾರ್ ಖೆಳಾ ಮಯ್ದಾನ್ ಆಸಾ ಕರ್ತಾತ್.
ಬಾಪ್ ಗ್ರೆಗರಿ ಇ. ಡಿಸೋಜಾ (1978 - 1982) ಆಂಜೆಲೊರ್ ಫಿರ್ಗಜೆ ಥಾವ್ನ್ ವರ್ಗ್ ಜಾವ್ನ್ ಫಜೀರಾಕ್ ಯೆತಾತ್. ಗಂಭೀರ್ ವದನಾಚೆ ತರ್ ಯೀ ಮೊವಾಳ್ ಕಾಳ್ಜಾಚೆ ತೆ ಜಾವ್ನಾಸ್ ಲ್ಲೆ. ಮೊವಾಳ್ - ಮೊಗಾಳ್ ಉಲೊವ್ಣೆಂ ಆತ್ಮೀಕ್ ಗರ್ಜೊ ಸುಧಾರ್ಸುಂಚಾಂತ್ ಕ್ರಿಯಾಳ್. ಭುರ್ಗ್ಯಾಂ ಥಂಯ್ ವಿಶೇಷ್ ಮೋಗ್ ದಾಕಯ್ತಾಲೆ.ಉ ಇಸ್ಕೊಲಾಚಾ ಬಾಂದ್ಪಾಚೆ ದುರಸ್ತಿ, ಪಿಯೆಂವ್ಚಾ ಉದ್ಕಾಕ್ ಇಸ್ಕೊಲಾ ಮುಖಾರ್ ಬಾಂಯ್ ಆಸಾ ಕರ್ತಾತ್. ಆರ್ಥಿಕ್ ಅಡ್ಚಣೆಂತ್ ಆಸ್ಲ್ಯಾಂಕ್
ಸಿ.ಒ.ಡಿ.ಪಿ ಸಂಸ್ಥ್ಯಾ ಥಾವ್ನ್ ಆರ್ಥಿಕ್ ಕುಮಕ್ ಮೆಳಾಶೆಂ ಕರ್ತಾತ್ . ಥೊಡ್ಯಾಚ್ ದಿಸಾಂಚಾ ಅಸ್ವಸ್ಥ್ ಕಾಯೆ ವರ್ವಿಂ ದೆವಾಧೀನ್ ಜಾತಾತ್. ತಾಂಚಾ ಮರ್ಣಾಂಚಿ ಖಬಾರ್ ಲೊಕಾಚಾ ಕಾಳ್ಜಾಂತ್ ಬಾರಿಚ್ ಆಘಾತ್ ಜಾಂವ್ಕ್ ಫಾವೊ. ಆಂಜೆಲೊರ್ ಗಾರ್ ಶೋಕಾಚರಣ್ ಜಾವ್ನ್ ಸರ್ವ್ ಅಂಗ್ಡ್ಯೊ ಬಂಧ್ ಕರ್ನ್ ಫಜೀರಾಂತ್ ತಾಂಚಾ ಅಂತಿಮ್ ದರ್ಶನಾಕ್ ಹಾರಿಹಾರಿನಿ ಜಮ್ತಾತ್.
ಬಾಪ್ ಗ್ರೆಗರಿಚಾ ಮರ್ಣಾ ನಂತರ್ ಬಾಪ್ ಮೈಕಲ್ ಪಿರೇರಾ (1982 - 85) ನಿವೃತ್ತ್ ಯಾಜಕ್ ತರ್ ಯೀ ಸದಾಂಚ್ ಧ್ಯಾನನ್ ಮಾಗ್ಣ್ಯಾಂತ್ ಮಾಗ್ನ್ ಜಾವ್ನಾಸ್ ಲ್ಲ್ಯಾ ತಾಂಕಾ ತಾತ್ಕಾಲಿಕ್ ವಿಗಾರ್ ಜಾವ್ನ್ ನೇಮಕ್ ಕರ್ತಾತ್. ದಾನ್ - ಧರ್ಮ್ ಕರ್ಚ್ಯಾಂತ್ ಉಕಲ್ ಲ್ಲೊ ಹಾತ್. ಲೊಕಾಚಾ ಸೆವೆಕ್ ತಾಂಕಿ ಪುರ್ತೊ ವಾವ್ರ್ ದೀವ್ನ್ ಹಾಂಗಾಸರ್ ತೆ ದೆವಾಧೀನ್ ಜಾಲೆ.
ಹಾಂಚೆ ಉಪ್ರಾಂತ್ ತಾತ್ಕಾಲಿಕ್ ವಿಗಾರ್ ಜಾವ್ನ್ ಜೆಜ್ವಿತ್ ಬಾಪ್ ಸಾಲ್ವೊದೋರ್ ಲೋಬೊ (1985 - 1986) ಆನಿ ಬಾ| ಲಿಗೊರಿ ಮಿನೇಜಸ್ (1986 - 87) ವಿಗಾರ್ ಜಾವ್ನ್ ಸೆವಾ ದಿತಾತ್. ತಾಂಚಾ ಆವ್ದೆರ್ ಇಗರ್ಜೆಕ್ ಫ್ಯಾನಾಂಚಿ ಮಾಂಡಾವಳ್ ಕರ್ತಾತ್.
ಉಪ್ರಾಂತ್ ಬಾ| ನೋರ್ಬಟ್ ಲೋಬೊ (1987 - 88) ಸೆವಾ ದಿತಾತ್. ಎಕಾ ವರ್ಸಾಚಾ ಆವ್ದೆಕ್ ವಿಗಾರ್ ಜಾವ್ನ್ ತಾಂಚಿ ತಾಂಕಿ ಪುರ್ತಿ ಸೆವಾ ದೀವ್ನ್ ಲೋರೆಟ್ಟೊ ಫಿರ್ಗಜೆಕ್ ವರ್ಗ್ ಜಾತಾತ್.
ಮಾ| ಗ್ರೆಗರಿ ಸೆರಾವೊ (1988 - 1993) ಪಾಂಚ್ ವರ್ಸಾಚಿ ಹ್ಯಾ ಫಿರ್ಗಜೆಂತ್ ವಿಗಾರ್ ಜಾವ್ನ್ ಸೆವಾ ದಿತಾತ್. ಹಾಂಚ್ಯಾ ಆವ್ದೆಂತ್ ಆಮ್ಚ್ಯಾ ಫಿರ್ಗಜೆಚೊ 150 ವರ್ಸಾಂಚೊ ಜುಬ್ಲೆವ್ ವ್ಹಡಾ ಗದ್ದಾಳಾಯೆನ್ ಆಚರಣ್ ಕೆಲೊ. ಸಬಾರ್ ಸಂಘ್ ಸಂಸ್ಥ್ಯಾಂಚಾ ಸ್ಥಾಪನೆಕ್ ತೆ ಕಾರಣ್ ಜಾಲ್ಯಾತ್. ಸಾಂ ವಿಶೆಂತ್ ಪಾವ್ಲ್ ಸಭಾ, ಐಸಿವೈಎಂ ಹಾಂಚಾ ಆವ್ದೆರ್ ಪ್ರಾರಂಭ್ ಜಾಲೆಂ. ಜುಬ್ಲೆವಾ ಸಂದರ್ಭಿ ಮೆರ್ಸಿನ್ ಮಾಯೆಚಿ ಇಮಾಜ್ ಸಗ್ಳ್ಯಾ ಫಿರ್ಗಜೆಚಾ ಕುಟ್ಮಾಕ್ ವರ್ನ್ ಎಕೇಕಾ ದಿಸಾ ಎಕಾ ಘರಾ ದವರ್ನ್ ಮಾಗ್ಣೆಂ ಕರುನ್ ಉಪ್ರಾಂತ್ ಇಗರ್ಜೆಕ್ ಪಾಟಿಂ ಹಾಡ್ಚೊ ಸಂಭ್ರಮ್ ಕೆಲ್ಲೊ ಆಜುನ್ ಯೀ ಉಗ್ಡಾಸ್ ಆಸಾ. ನವಿ ಘಾಂಟಿಚೆ ತೋರ್ , ಆಲ್ತಾರೆಚೆಂ ನವೀಕರಣ್ , ಇಸ್ಕೊಲಾ ಖಾತಿರ್ ಉದ್ಕಾಚಿ ವ್ಯವಸ್ಥಾ ಅಶೆಂ ಸಬಾರ್ ಜುಬ್ಲೆವಾಚಿಂ ಯೋಜನಾಂ ಜ್ಯಾರಿ ಕೆಲಿಂ. 150 ವರ್ಸಾಂಚಾ ಉಗ್ಡಾಸಾಕ್ ಸ್ಮಾರಕ್ ಪುಸ್ತಕ್ ಪಯಿಲ್ಲೆಂ ಪಾವ್ಟಿಂ ಆಮ್ಚೆ ಫಿಗರ್ಜೆಂತ್ ಉಗ್ತಾವಣ್ ಕೆಲೊ. ಮುಡಿಪುಂತ್ ಜುಬ್ಲೆವಾಚಾ ಉಗ್ಡಾಸಾ ಖಾತಿರ್ ಕೊಪೆಲ್ ಬಾಂದ್ಲೆಂ. ಉಪ್ರಾಂತ್ ಮುಡಿಪುಂತ್ ಏಕ್ ನವಿ ಇಗರ್ಜ್ ಬಾಂದ್ ಲ್ಲಿ ಕೀರ್ತ್ ಮಾ| ಬಾ| ಗ್ರೆಗರಿ ಸೆರಾವೊಕ್ ಫಾವೊ ಜಾತಾ. ಪಾಂಚ್ ವರ್ಸಾಂಚೆ ಸೆವಾ ದೀವ್ನ್ ಫಲಿಮಾರ್ ಫಿರ್ಗಜೆಕ್ ವರ್ಗ್ ಜಾತಾತ್.
ಮಾ| ಬಾ| ವಿಕ್ಟರ್ ಡಿಸೋಜಾ (1993 - 2000) ಕೊಕ್ಕಡ ಫಿರ್ಗಜೆ ಥಾವ್ನ್ ಫಜೀರಾಕ್ ಆಯಿಲ್ಲೆ. ಮಾ| ಬಾ| ವಿಕ್ಟರ್ ಡಿಸೋಜಾ ಸಾತ್ ವರ್ಸಾಂಚಿ ಆಪೂರ್ವ್ ಸೆವಾ ತೆ ದಿತಾತ್. ಲೊಕಾ ಮೊಗಾಳ್ ಜಾವ್ನ್ ಫಿರ್ಗಜೆಚಿ ಸೆವಾ ಕರ್ತಾತ್. ವಾಡ್ಯಾನಿ ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಸ್ಥಾಪನ್ ಕರ್ನ್ ಫಿರ್ಗಜ್ ಲೊಕಾ ಮಧೆಂ ಎಕ್ವಟ್ ಹಾಡುನ್ ಯುವಜಣಾಂ ಥಂಯ್ ವಿಶೇಷ್ ಆಸಕ್ತ್ ದವರ್ನ್ ಸಿವೈಎಂ ಬಳ್ವಂತ್ ಕರುಂಕ್ ವರ್ತಿ ಮ್ಹಿನತ್ ಕಾಡ್ಲ್ಯಾ. ಮುಡಿಪು ಸ್ವತಂತ್ರ್ ಫಿರ್ಗಜ್ ಜಾವ್ನ್ ಪರಿವರ್ತನ್ ಕರ್ತಾತ್.
ಇಸ್ಕೊಲಾಚಿ ದುರಸ್ತಿ, ನವೊ ಪೊರ್ಟಿಕೊ, ಸಿಮಿಸ್ತ್ರಿಕ್ ದೊರೊ ಬಾಂದ್ಲೆ ಯೋಜನ್ ಯಶಸ್ವಿ ರಿತಿನ್ ಪೊಂತಾಕ್ ಪಾಯ್ತಾತ್. ಥೊಡ್ಯಾಚ್ ಮ್ಹಹಿನ್ಯಾಚಾ ಆವ್ದೆಂತ್ ಎಲ್ಯಾರ್ ಪದ್ವಾಂತ್ ನವಿ ಇರ್ಗಜ್ ಬಾಂದುನ್ ಉಗ್ತಾವಣ್ ಕರ್ತಾಂತ್ . ಸಾತ್ ವರ್ಸಾಂಚಿ ಸೆವಾ ದೀವ್ನ್ ಫಲಿಮಾರ್ ಫಿರ್ಗಜೆಕ್ ವರ್ಗ್ ಜಾವ್ನ್ ವೆತಾತ್.
ಮಾ| ಬಾ| ರಿಚ್ಚರ್ಡ್ ಸಲ್ಡಾನ್ಹಾ ( 2000 - 2007) ವಾಮದಪದವು ಫಿರ್ಗಜೆ ಥಾವ್ನ್ ಫಜೀರಾಕ್ ಯೆಣೆಂ. ಉತರ್ ಪ್ರಾಯ್ ಜಾಲ್ಯಾರಿಯೀ ಫಜೀರ್ ತಸಲ್ಯಾ ಗುಡ್ಯಾ - ಫಾಲ್ಕ್ಯಾಂಚಾ ಫಿರ್ಗಜೆಂತ್ ತಾಂಚಿ ಸೆವಾ ಅಪೂರ್ವ್. ಕೃಷಿ ಅಭಿವೃದ್ಧಿ ಕರುನ್ ಕೃಷೆ ಥಾವ್ನ್ ಆದಾಯ್ ಜೊಡ್ಚ್ಯಾಕ್ ವರ್ತಿ ಮ್ಹಿನತ್ ಕಾಡ್ಲ್ಯಾ. ಭುರ್ಗ್ಯಾಂಚಾ ಶಿಕ್ಪಾ ಥಂಯ್ ವಿಶೇಷ್ ಆಸಕ್ತ್ ದಾಕವ್ನ್ ಸಬಾರ್ ಭುರ್ಗ್ಯಾಂಕ್ ಉಂಚ್ಲೆಂ ಶಿಕಪ್ ದೀಂವ್ಕ್ ಜಾಯ್ತೆಂ ಪ್ರಯತನ್ ಕೆಲಾಂ. ಇಸ್ಕೊಲಾಚಾ ಶತಮಾನೋತ್ಸವಚಾ ಉಡಾಸಾಕ್ ನವೆಂ ಇಸ್ಕೊಲಾಚೆಂ ಬಾಂದಪ್, ರಂಗ್ ಮಂಟಪ್ , ಖೆಳಾ ಮಯ್ದಾನಾಚೆಂ ಕಾಮ್ ಯಶಸ್ವಿ ರಿತಿನ್ ಪೊಂತಾಕ್ ಪಾವಯ್ಲಾಂ. ಎಲ್ಯಾರ್ ಪದವ್ ಕೊಪೆಲ್ ಆಸ್ ಲ್ಲೆಂ ಸ್ವತಂತ್ರ್ ಫಿರ್ಗಜ್ ಜಾವ್ನ್ ಪರಿವರ್ತನ್ ಕರ್ತಾಂತ್. ಸಾತ್ ವರ್ಸಾಂಚಾ ಸೆವೆ ಉಪ್ರಾಂತ್ ಬೆಳ್ವಾಯಿ ಫಿರ್ಗಜೆಕ್ ವರ್ಗ್ ಜಾತಾತ್.
ಮಾ| ಬಾ| ಪಾವ್ಲ್ ಪಿಂಟೊ (2007-2008) ವಾಲೆನ್ಸಿಯಾ ಥಾವ್ನ್ ಫಜೀರಾಕ್ ಆಯಿಲ್ಲೆ ಬಾಪ್ ಪಾವ್ಲ್ ಪಿಂಟೊ ಫಿರ್ಗಜೆಂತ್ಲ್ಯಾ ಸರ್ವ್ ವಾಡ್ಯಾನಿ ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಆಸಾ ಕರುನ್ ತಿ ಬಳ್ವಂತ್ ಜಾಂವ್ಚಾಕ್ ಪ್ರಯತನ್ ಕರ್ತಾತ್. ಸಬಾರ್ ಚಟುವಟಿಕೊ ಕರ್ನ್ ಫಿರ್ಗಜ್ ಕ್ರಿಯಾಳ್ ಜಾಂವ್ಕ್ ವಾವುರ್ಲ್ಯಾಂತ್. ಎಕಾ ವರ್ಸಾಂಚಾ ಸೆವೆ ಉಪ್ರಾಂತ್ ಕಿರೆಂ ಫಿರ್ಗಜೆಕ್ ವರ್ಗ್ ಜಾತಾತ್.
ಮಾ| ಬಾ| ಸ್ಟ್ಯಾನಿ ಪಿರೇರಾ (2009 -) ಗಂಗೊಳ್ಳಿ ಫಿರ್ಗಜೆ ಥಾವ್ನ್ ಫಜೀರಾಕ್ ಬಾಪ್ ಸ್ಟ್ಯಾನಿ ಪಿರೇರಾಚೆಂ ಯೆಣೆಂ ಜಾತಾ. ಸಾಧ್ಯಾ ಸ್ವಭಾವಚೆ, ಗೂಂಡ್ ಚಿಂತ್ಪಾಚೆ, ಸಂಗೀತಾಚಾ ದೆಣ್ಯಾಚೆ, ಸೊಸ್ಣಿಕಾಯೆನ್ ಭರ್ ಲ್ಲೆ, ಮಯ್ಪಾಸಿ ಯಾಜಕ್, ಲೊಕಾ ಥಂಯ್ ಹುಸ್ಕೊ ದಾಕವ್ನ್ ಗೌರವಾನ್ ದೆಕ್ಚೆ, ಬರೆಂ ಉತಾರ್ ಉಲೊಂವ್ಕ್ ಪ್ರೇರಣ್ ದಿಂವ್ಚೆಂ, ಅಶೆಂ ಬರೆಂ ಉತಾರ್ ಬರೆಂ ಕರುಂಕ್ ಸಕ್ತಾ ಮ್ಹಳ್ಳೆಂ ದಾಕವ್ನ್ ದಿಲಾಂ. ಬಾಪ್ ಸ್ಟ್ಯಾನಿ ಪಿರೇರಾ ಹಾಂಚಾ ಮುಖೆಲ್ಪಣಾರ್ ಆಜ್ ಫಜೀರಾಂತ್ ನವಾಲ್ ಜಾಲಾಂ. ಆಮ್ಚ್ಯಾ ಲೊಕಾಚಿ ಸಬಾರ್ ತೆಂಪಾಚಿ ಆಶಾ ಆನಿ ಅಭಿಪ್ರಾಯೆಕ್ ಸರಿ ಜಾವ್ನ್ ನವೆಂ ದೇವ್ ತೇಂಪ್ಲ್ ಲ್ಹಾಯಿಕ್ ಮುಖೆಲ್ಯಾಂಚಾ ಸಾಂಗಾತ್ಪಣಾನ್, ಫಿರ್ಗಜ್ ಲೊಕಾಚಾ ಸಹಕಾರಾನ್ ಆಜ್ ಏಕ್ ಮಜ್ಬೂತ್ ದೆವಾಳ್ ಫಾವೊ ಜಾಲಾಂ. ನವ್ಯಾ ಇಗರ್ಜೆ ಬಾಂದ್ಪಾ ಯೋಜನಾ ಪಾಟ್ಲ್ಯಾನ್ ಸಬಾರ್ ವಾವ್ರ್ , ತ್ಯಾಗ್ - ಸಾಕ್ರಿಫಿಸ್ ಭೆಟಯ್ಲಾ. ಯೋಜನಾ ಸಾಂಗಾತಾ ಫಿರ್ಗಜೆಚಾ ಗೊವ್ಳಿಕ್ ವಾವ್ರಾಕ್ ಕಿತೆಂಚ್ ಅಡ್ಕಳ್ ಜಾಯ್ನಾಶೆಂ ಸೊಸ್ಣಿಕಾಯೆನ್ ವಾವ್ರ್ ದಿಲಾ. 22-08-2012 ವೆರ್ ನವ್ಯಾ ಇಗರ್ಜೆಕ್ ಬುನ್ಯಾದಿ ಫಾತೊರ್ ದವರ್ಲ್ಯಾ ದಿಸಾ ಥಾವ್ನ್ ನಿರಂತರ್ ವಾವ್ರ್ ದೀಂವ್ಕ್ ಲೊಕಾಕ್ ಸಾಂಗಾತಾ ಹಾಡುಂಕ್ , ದಾನ್ ದೀಂವ್ಕ್ ಹ್ಯಾ ಸರ್ವಾಂಕ್ ಪ್ರೇರಣ್ ಬಾಪ್ ಸ್ಟ್ಯಾನಿ ಪಿರೇರಾಚೆ ಬರೆಂ ಉತಾರ್. ಅಶೆಂ ಏಕ್ ಚಾರಿತ್ರಿಕ್ ಘಡಿತಾಕ್ ಸಾಕ್ಸ್ ಜಾವ್ನ್ ಫಜೀರ್ಚಾ ಚರಿತ್ರೆಂತ್ ಬಾಪ್ ಸ್ಟ್ಯಾನಿ ಪಿರೇರಾಚೆ ನಾಂವ್ ದಾಕ್ಲೊ ಜಾವ್ನ್ ಉರ್ಲೆಂ. 15 ದಶೆಂಬರ್ 2014 ವೆರ್ ನವಿ ಇಗರ್ಜ್ , ಯಾಜಕಾಚೆಂ ವಸ್ತೆ ಘರ್, ಘಾಂಟಿಚೆ ತೋರ್ , ಸಭಾಸಾಲ್, ಅಶೆಂ ಸರ್ವ್ ಸವ್ಲತಾಯೆನ್ ಭರ್ ಲ್ಲೆಂ ದೇವ್ ತೇಂಪ್ಲ್ ಫಾವೊ ಜಾಲೆಂ. ಫಿರ್ಗಜೆ ಖಾತಿರ್ ಬಾಪ್ ಸ್ಟ್ಯಾನಿ ಪಿರೇರಾ ಹಾಣಿ ದಿಲ್ಲ್ಯಾ ಸೆವೆ ಖಾತಿರ್ ಫಜೀರ್ ಚಿ ದೇವ್ ಪ್ರಜಾ ಆಭಾರಿ ಜಾವ್ನಾಸಾ. ಬರಿ ಭಲಾಯ್ಕಿ ಮತಿಕ್ ಸಮಾಧಾನ್ , ದೇವ್ ತಾಂಕಾ ಫಾವೊ ಕರುನ್ ತಾಣಿ ಹಾತಿ ಘೆತ್ ಲ್ಲಿಂ ಸರ್ವ್ ಕಾಮಾಂ ಯಶಸ್ವಿ ರಿತಿನ್ ಪೊತಾಂಕ್ ಪಾವೊಂದಿ ಮ್ಹಣ್ ಆಮಿ ಸರ್ವ್ ಆಶೆತಾಂವ್.
ನವ್ಯಾ ದೇವ್ ತೆಂಪ್ಲಾಕ್ ಬುನ್ಯಾದಿ ಫಾತೊರ್ ದವರ್ನ್ ನವ್ಯಾ ಇಗರ್ಜೆಚೆಂ ಉಗ್ತಾವಣ್ ಕೆಲ್ಲ್ಯಾ, ಗರ್ಜೆಚೊ ಆಧಾರ್ ಆನಿ ಸಹಕಾರ್ ದಿಲ್ಲ್ಯಾ ಮಂಗ್ಳುರ್ ದಿಯೆಸೆಜಿಚೊ ಗೊವ್ಳೆ ಬಾಪ್ ಅ|ಮಾ|ದೊ| ಲುವಿಸ್ ಪಾವ್ಲ್ ಸೊಜ್ , ನವೆಂ ದೇವ್ ತೆಂಪ್ಲ್ ಜಾಂವ್ಚ್ಯಾಕ್ ವಿಗಾರಾ ಸಾಂಗಾತಾ ಹಾತಾಕ್ ಹಾತ್ ದೀವ್ನ್ ವಾವುರ್ಲ್ಯಾಂ ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ಶ್ರೀ ವಿಕ್ಟರ್ ಮೊಂತೇರೊ , ಕಾರ್ಯದರ್ಶಿ ಶ್ರೀ ಫೆಲಿಕ್ಸ್ ಮೊಂತೇರೊ , ಸರ್ವ್ ಗುರ್ಕಾರ್, ಗೊವ್ಳಿಕ್ ಪರಿಷದ್ , ಆರ್ಥಿಕ್ ಸಮಿತಿ , ಬಾಂದ್ಪಾ ಕಲೆಕ್ಷನ್ ಸಮಿತಿ ಆನಿ ಉಗ್ತಾವಣ್ ಸಮಿತಿ ಸಾಂದೆ , ಕೊವೆಂತಾಚಿ ಧಮ್ ಭಯ್ಣಿ , ಸರ್ವ್ ಫಿರ್ಗಜ್ ಗಾರ್ , ಆಮ್ಕಾ ಆಧಾರ್ಸಿಲ್ಲ್ಯಾ ಆನಿ ಸುಧಾರ್ಸಿಲ್ಲ್ಯಾ ಸರ್ವ್ ದಾನಿಂಚೊ , ಕಾಮೆಂಲ್ಯಾಚೊ , ಹಿತಚಿಂತಕಾಂಚೊ ಆನಿ ಸಹಕಾರ್ ದಿಲ್ಲ್ಯಾ ಸರ್ವಾಂಚೊ ಮನಪೂರ್ವಕೀ ಉಪ್ಕಾರ್ ಬಾವುಡ್ತಾಂವ್ ಆನಿ ಸರ್ವ್ ಬರೆಂ ಮಾಗ್ತಾಂವ್.